LITTERÆ HUGONIS, LEUCORUM EPISCOPI, QUIBUS CONFIRMAT MONASTERIO CLUNIACENSI DONATIONEM ECCLESIÆ DE MONSTEROLIO A GERALDO (VOCATO AD BARBAM) FACTAM, ETC.

Reverendis fratribus et amicis Hugoni, venerabili abbati, et sacro conventui Cluniacensi, Hugo, Dei gratia Leucorum episcopus, salutem in Domino. Monasticæ severitas disciplinæ, quæ, divina opitulante clementia, in cœnobio vestro splendide vigere dignoscitur, nos invitat ut petitionibus vestris, quæ a rationis tramite non discordant, facilem præbeamus assensum. Eapropter, dilecti in Domino fratres, vestris precibus inclinati, ecclesias, possessiones et decimas quas in nostra habetis diocesi, auctoritate vobis præsentium confirmamus, ecclesiam videlicet de Monsterolio, cum decimis, libertatibus et immunitatibus suis, quam vobis pia devotione dederunt Jeraldus, vocatus ad Barbam, Galterius de Novis Casis, frater ejus, et Arnulphus, filius ejusdem Jeraldi; ad quam, cum vacare contigerit, liceat priori et fratribus Thiecurth nobis et successoribus nostris qui pro tempore fuerint præsentare presbyterum, qui a nobis animarum cura percepta vobis de temporalibus et nobis de spiritualibus respondeat, sicut vidimus in vestris privilegiis contineri. Et quidem jus præsentandi, quod præfati donatores in præfata ecclesia habuerunt, vobis concedimus et confirmamus. Insuper confirmamus vobis ecclesiam de Secbecth, quam Arnulphus, filius Jeraldi, vobis dedit, et ecclesiam de Renivilla, quam dictus Galterus vobis dedit. Harum sane ecclesiarum cimiteria libera esse decrevimus, statuentes ut infra fines parrochiarum ipsarum nulli liceat de novo ecclesiam vel oratorium ædificare absque vestro consensu. Nulli ergo omnino hominum liceat hanc paginam nostræ confirmationis et concessionis infringere vel ei ausu temerario contraire. Si quis autem hoc attentare præsumpserit, anathema maranatha. Signum Frederici, decani et archidiaconi, qui sigilli quoque sui appositione præsenti confirmationi se favorem præbuisse declarat. Testis est magister Hugo; Fulco, præpositus de Balno; Udo de Berga. Datum per manum Galterii, cancellarii nostri, anno incarnationis Verbi M. C. XCVII, VIII kal. junii.

Numéro CBMA : 5812

Paris, BNF, lat. 5459, cartulaire D (copie), n. 235. (cartulaire)