Donation d’un mas par Gaucelin, évêque de Lodève, et confirmation par le même d’une autre donation.

Anno Domini M°C°LXXXV°, mense martii, ego Gaucelinus, Lodovensis episcopus, per me et per meos successores, bona fide et sine dolo et intuitu pietatis et causa religionis, dono, laudo, concedo et cum hac carta in perpetuum trado Domino Deo et ecclesie Beate Marie de Salvanesco et tibi Bernardo, abbati illius loci, et omnibus fratribus ibidem Deo servientibus tam presentibus quam futuris, videlicet quicquid habeo et habere debeo et aliquis habet et habuit de me in toto manso, qui appellatur Tibertus, ut ab hac die in antea habeatis hunc mansum, teneatis et plenarie et integre jure doni in perpetuum possideatis sine inquietudine mea et meorum successorum ; et confrontatur iste mansus cum via qua itur a Pegairol apud Sobers ex una parte, et ex alia cum capmansura Gregoriorum, et ex alia cum tenedone Guillelmi Berengarii, et ex alia extendit se usque ad Baucium. Similiter laudo et confirmo in perpetuum vobis et vestris successoribus illud donum quod Alzarami in predicto manso dederunt vobis et jam dicto monasterio, pro remedio anime sue parentumque suorum, perpetualiter contulerunt. Et sciendum quod abbas Salvanensis tenet ab episcopo Lodovensi et pro usatico dabit ei et successoribus ejus unum denarium annuatim, ad festum Sancti Andree, hunc mansum et nichil aliud. Testes sunt : Petrus de Baucio, archipresbiter, Geraldus de Pratis, sacerdos, Helias, monacus, magister Raimundus, Guillelmus de Baucio, Durantus Guirardi, Petrus de Corcenatz, Bernardus de Nauco, Bernardus de Promiliaco, monacus, et Deodatus de Lodova, conversus. Hanc cartam ego predictus episcopus laudo et confirmo et sigilli mei impressione corroboro. Petrus succentor scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)