Raymond Guibert, sa parente et ses enfants renoncent à leurs prétentions sur Promillac.

Anno Dominice incarnationis M°C°LXXXIII°, ego Raimundus Guitbertus et ego Florencia, cognata supradicti Raimundi, et infantes mei, videlicet Raimundus, Berengerius, Bernardus et Guillelmus, nos omnes insimul non coacta sed spontanea voluntate, pro amore Dei et remissione peccatorum nostrorum, solvimus et guirpimus Domino Deo et monasterio Beate Marie de Salvanesc et tibi Bernardo, abbati, omnique ejusdem loci conventui presenti et futuro, omnem illam clamationem et querimoniam quam vobis in territorio de Promillac faciebamus vel aliquo consanguinitatis jure facere poteramus, et promittimus vobis per stipulationem quod contra hanc solutionem, guirpitionem non veniemus neque aliqua persona nostro consilio vel ingenio, sed firmam et stabilem vobis et posteris vestris perpetuo jure possidere faciemus, et, ut omnia supradicta firma et illibata vobis permaneant, tactis sacrosanctis evangeliis corporaliter, juramus. Pro hac vero solutione, guirpitione dedistis nobis de caritate XXV solidos Melgorienses, de quibus nummis apud vos nichil in debito remansit. Testes hujus rei sunt : Guillelmus Bernardus, Bernardus de Salas, Petrus de Luc, B. de Albanac, Ugo, Petrus, Deodatus Parator, Arnaldus de La Tor, Raimundus de Tornamira, Guillelmus de Sancto Felicio, Guillelmus Bego, Petrus Elias, Petrus de Vila, Bernardus Engerbertus. Frater Petrus scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)