Donation de dîme par Hugues de Montorzier et sa femme.

In nomine Domini. Anno incarnationis Ejusdem M°C°LXXIII°, mense julii, ego Ugo de Monte Urserio et ego Cedalia, uxor ejus, nos ambo pariter sine omni retentione, bona fide et sine inganno, pro amore Dei et remissione peccatorum nostrorum, consilio etiam et laudatione Ramundi de Nanto, donamus et laudamus et titulo perfecte donationis tradimus Deo et monasterio Beate Marie de Salvanes et tibi Raimundo, abbati, omnique ejusdem loci conventui presenti et futuro, medietatem videlicet totius decime universi territorii de Sols, sicut nos et feudalis noster Miro visi sumus habere et tenere, et promittimus per stipulationem quod contra hanc donationem non veniemus neque quisquam nostro ingenio vel arte, et sic faciemus vobis tenere et habere in pace sicut nos et predictus feudalis noster Miro visi sumus habere et tenere in pace, et hoc juramus super sancta evangelia presentialiter a nobis contacta. Et vos dedistis nobis de caritate LX solidos Melgorienses ita ut nichil apud vos remansit in debito. Et ego Ramundus de Nanto predictus laudo et confirmo tibi Ramundo, abbati, et universis fratribus Salvaniensibus presentibus et futuris hanc donationem et ratam illam habeo et solvo vobis quidquid ibi juris habeo et promitto per stipulationem quod contra eam non veniam neque quisquam meo ingenio vel arte. Testes hujus donationis, quam Ugo predictus et uxor ejus fecerunt, sunt : Petrus Berengarius de Castlucio, Petrus Helias, Brengarius de Molnar, Ramundus de Verduno et Petrus Pellicerii. Laudationis vero Ramundi de Nanto testes sunt : Ademarus de Cantobre et Petrus Berengerii supradictus et ceteri qui supra. Guillelmus de Narbona scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)