Donation d’une parcelle de terre par Rigal, fils de Raymond de Cabrespine, avec renonciation à des prétentions sur le mas de Berlou.

Anno ab incarnatione Domini M°C°LXXI°, ego Rigaldus, Raimundi de Cabrespina dictus filius, bona fide et sine inganno et absque omni retentione pro amore Dei, dono et laudo et titulo donationis cum hac carta trado monasterio Beate Marie de Salvanesc et tibi Pontio, abbati, omnique ejusdem loci conventui presenti et futuro meam partem et medietatem illius facie que est juxta Ancisam, videlicet alodium, feudum, beneficium, vicariam, sirventatge et decimam et quicquid ibi habeo et habere debeo ; et solvo et dimitto vobis omnem clamationem et querimoniam quam vobis faciebam in manso de Berlone. Pro hac donatione et solutione dedistis michi de caritate XLIII solidos Melgorienses et VI denarios. Et ego predictus Rigaldus juravi super sancta evangelia hec omnia predicta. Testes hujus rei sunt : Arnaldus de Turre, Ugo de Roca, Guillelmus Agulloni et Gitbertus et Raimundus, fratres ejus, Bernardus de Roaiss, Deodatus Guiraldi de Sancto Affricano et Bernardus Gruer. Juris vero jurandi et laudationis testes sunt : Ugo Pellicerii, Bernardus Bertrandi de Drulia, Raimundus Boysset de Gentiaco, sub presentia dompni Pontii, abbatis, et Guillelmi de Narbona qui jusjurandum exegit, et Petri Giberti. Guillelmus predictus scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)