Latran. Bulle d’Honorius III prescrivant aux archevêques, évêques et prélats de maintenir les religieux de Cîteaux dans la jouissance de leurs privilèges.

Honorius episcopus, servus servorum Dei, venerabilibus fratribus archiepiscopis et episcopis et dilectis filiis aliis ec[c]lesiarum prelatis ad quos littere iste pervenerint salutem et apostolicam benedictionem. Benefatiens Dominus bonis et rectis corde dilectos filios fratres Cisterciensis ordinis in via mandatorum Ipsius inoffense currentes tanquam populum acceptabilem sibi numero et merito ampliavit eisque de rore celi et terre pinguedine benedicens dilatavit locum tentorii ejusdem ordinis et pelles tabernaculorum ejus extendit, set quod dolentes refferimus in hac via qua ambulant superbi contra eos laqueos extendentes, immo velut torrens iniquitatis irruentes in eos, ipsos bonis suis que soli Domino sunt dicata non solum nequiter defraudare cum filii hujus seculi prudentiores filiis lucis in generatione sua sint, verum etiam in iniquitate potentes violenter spoliare nituntur, et quod gravius est nonnulli de his qui eos debuerant in Xristi visceribus carius amplexari et favorabilius confovere, ipsos immanius persequentes privilegia que ipsis a Sede Apostolica suis exigentibus meritis sunt indulta gestiunt penitus enervare, dicendo illa fuisse omnino in generali concilio revocata vel alias intellectus privilegiorum suorum pene penitus fructu frustrentur per quod illi non tam eisdem fratribus quam nobis injuriari probantur, dum contra Sedis Apostolice indulgentias memoratos fratres temere perturbare presumunt, molientes contra Nostre plenitudinem potestatis dum indulta Nostra irreverenter impugnant. Nos igitur qui predictos fratres speciali prerogativa dilectionis et gratie amplexam utpote qui vigiter offerentes Domino suorum vitulos labiorum non solum Nobis set etiam universali ec[c]lesie piis intercessionibus incomparabiliter suffragantur, nolentes hujusmodi vexationibus eorum amaricare quietem quos potius tenemur omnimodis consolari, universitatem vestram monemus et ortamur attente ac per apostolica vobis scripta precipiendo mandamus quatinus supradictos fratres ob reverentiam divinam et nostram habentes in visceribus caritatis eis privilegia et indulgentias Apostolice Sedis eisdem concessas inviolabiliter conservetis et faciatis ab aliis conservari, salva moderatione concilii generalis, videlicet ut de alienis terris a tempore predicti concilii adquisitis et de cetero adquirendis exsolvant decimas ecclesiis quibus ratione prediorum antea solvebantur, nisi aliter cum eis duxerint componendum, alias quoque dictos fratres ab incursibus malignorum taliter deffendatis quod deffensores justitie ac pietatis probemini amatores Deumque vobis propitium et Nos reddatis exinde favorabiles et benignos. Datum Laterani, II nonas Januarii, Pontificatus nostri anno IIIo.

Rodez, AD Aveyron, H(006) 001, cartulaire de l’abbaye de Sylvanès (cartulaire)