Vente par Mahaut, fille de feu Hugues le Sauvage, chevalier, au chapitre de Saint-Thomas de Crépy, du quart de la dîme d'Orrouy, pour le prix de quatre-vingt-dix livres parisis, avec l'approbation de Thomas d'Orrouy et Renaud de Donneval, qui, comme seigneurs, accordent l'amortissement, - ladite vente étant en outre scellée par l'official de Soissons.

Je Mahauz, fille jadis mon seigneur Huon le Sauvage, chevalier, qui fu, faiz asavoir a touz çaus qui sont et qui avenir sont, qui ces presentes letres verront et orront, que j'ai vendu au doien et au chapistre de l'eglise Saint Toumas de Crespi toute la quarte part de la disme de Orooir, que j'avoie de mon heritage et tenoie de Toumas de Orooir, et cil Thoumas tenoit de Renaut de Donneval ; et ce vendage ai je fait de l'acort et dou conseil et de la volenté mon seigneur Rogier de Palarne, mon oncle, et les devant diz Thoumas et Renaut, seigneurs dou fié, par le pris de quatre vinz lbr. et .x. lb. de parisis, de quoi mes gréz est faiz en bons deniers contanz ; et par ce, renonce je des ci en avant a ce que je ne puisse dire que cil denier ne m'aient esté conté et baillié et paié, et a toutes autres choses qui me pourroient aidier a ce que li marchiéz et la couvenance de cest vendage puissent estre rapelé ou retraitié en tout ou en partie ; et par mi les deniers devant diz que j'ai eu de ce vendage, promet je loialment, par la foi de mon cors et par mon serement que je en ai donné, que je contre ce vendage ne venrrai des ore en avant, ainz le garandirai loialment as us et as coustumes dou païs, ne ne querrai art ne engien, ne ne ferai chose par quoi l'eglise devant dite soit perdanz ne damagiee, ne , ne traveilliee ne empeechiee seur cele quarte part de la disme devant dite. Aprés, je Thoumas de Orooir, de cui la devant dite Mahauz tenoit cele quarte part de cele disme, et je Renauz de Donneval, de cui cil Thoumas tenoit, faisons asavoir a touz que nous, comme seigneur dou fié, si comme il est dit devant, voulons et greons et loons le vendage devant dit et otroions a la devant dite eglise, pour nous et pour noz mainburnies, que ele des ore en avant tiengne et ait et joïsse a touz jourz en morte main cele quarte part de cele disme, sanz nul reclaim et sanz faire en service nul, ne loier, ne don, ne grace, mais quitement et franchement la tiegne a touz jours ; et de ces choses tenir avons nous donné les foiz de noz cors. Et en tesmoignage de toutes ces choses devant dites, que eles soient fermes et estables, je premierement Mahauz devant dite, et nous aprés, Thoumas et Renauz devant dit, avons fait seeler ces presentes letres de noz propres seauls par devant la court de Soissons ; et par ce li officiaus de celi court de Soissons a nostre requeste fist metre le seel de celi court de Soissons en ces letres, avueques noz seauls, pour greigneur conoissance de noz seauls. Ce fu fait en l'an de l'incarnacion Nostre Seigneur .M. CC. et cinquante quatre, ou mois de marz.

Benoit Tock

Beauvais, AD Oise (original)