Le prévôt Jean, le doyen Elembert et tout le chapitre cathédral d'Arras confirment à l'abbaye de Saint-Denis la possession de l'autel d'Annequin.

In nomine Patris et Filii et Spiritus Sancti amen. Johannes prepositus, Elembertus decanus cum universo Attrebatensis ecclesie beate Marie capitulo, universis Dei fidelibus in perpetuum. Ea que a predecessoribus nostris intuitu pietatis ecclesiis Dei collata sunt, scriptis nostris eodem intuitu gratanter communire debemus ne forte in dubitationis scrupulum relabantur. Proinde noverint presentes pariter et futuri quod veniens in capitulum nostrum karissimus amicus et familiaris noster Hugo beati Dyonisii venerabilis abbas, supplici nos devotione rogavit quatinus, ob amorem Dei et reverentiam gloriosi martyris Dyonisii, donationem altare de Anichin quod pie recordationis Alvisus quondam Attrebatensis episcopus assensu fratrum suorum ejusdem gloriosi martyris ecclesie pro remedio anime sue atque predecessorum suorum perpetuo jure tenendum concesserat ut exinde ante beatorum martyrum corpora cereus indesinenter arderet, nostris litteris muniremus. Nos igitur, inspecto privilegio prefati Alvisi, ejusque donationem nichilominus accendentes ut ejusdem beneficii participes fieri mereamur, pretaxatam donationem communi favore presenti pagina confirmamus et sigilli nostri munimine roboramus, salvo tamen jure in omnibus Attrebatensis episcopi et ministrorum ejus sicut in scripto privilegio continetur. Predicte vero ecclesie fratres decem solidos in octavis Assumptionis beate Marie nobis annuatim persolvent. Ad hoc autem communiter ab utroque capitulo concessum pariterque statutum est ut quarto decimo kalendas novembris nos pro fratribus eorum defunctis et ipsi pro nostris singulis annis anniversarium celebremus. Si quis autem hanc confirmationem constitutionemque violare presumpserit eterne maledictioni subjaceat. Et ut hoc perpetuum robur obtineat, huic privilegio nostro pretaxatum privilegium subnotari et utrumque sigillo nostro munire curavimus.

Benoit Tock

[non indiqué] ([non indiqué])