Frumaud, évêque d'Arras, le prévôt Roger, le doyen Mathieu et tout le chapitre cathédral d'Arras notifient l'accord qui est intervenu entre eux au sujet de l'élection du chantre.

Frumaldus, Dei gratia Atrebatensis episcopus, et Rogerus prepositus, Matheus decanus cum universo Atrebatensis aecclesiae capitulo, omnibus qui literas istas inspexerint, in Domino salutem. Quoniam ex gravedine molis corporee memoria hominum labilis est et ex oblivione preteritorum sepissime questiones de recidivo oriuntur, unde et contentiones et scismata, iccirco ad evitandam tam frequentem in aecclesia Dei pestilentiam compositionem, que inter nos de electione cantoris nostri per bonos viros concordiae et pacis amatores intercessit, scripto memoriali dignum duximus commendare, quae talis est. Cum post mortem Anselli cantoris nostri de alio substituendo controversia mota fuisset et non sine gravi utriusque partis dispendio hinc inde diutissime esset decertatum, tandem vexatione dante intellectum in hunc modum pari consensu convenimus, quod post primam ab illa questione mota cantoris electionem que celebrata est anno Domini Mº Cº LXXXIIº, capitulum et episcopus in unum convenient et presente episcopo, sivae sit canonicus sive non, de eligendo cantore tractabitur et si unanimiter omnes, episcopus videlicet et capitulum, in aliquam personam per Dei gratiam consentire poterint, illa absque omni contradictione et calumnia nominabitur et installabitur. Si vero, quod Deus avertat, communem concordiam non invenerint, et episcopus pariter et capitulum unum de archidiaconis, duos presbiteros, unum diaconum et unum subdiaconum melioris opinionis et sanioris consilii eligent, qui, tacto sacrosancto evangelio, jurabunt, quod illum de capitulo nostro in cantorem eligent, quem ad officium illud magis utilem et idoneum essae cognoverint. Hanc etiam compositionem nostram, ut in perpetuum firma et inconcussa servetur, appositione sigillorum nostrorum corroborari fecimus.

Benoit Tock

[non indiqué] ([non indiqué])