André, évêque d'Arras, concède le prieuré d'Aubigny à l'abbaye du Mont-Saint-Éloi, à charge pour celle-ci d'y établir des chanoines réguliers à la mort des séculiers qui l'occupent, et notifie une donation effectuée en faveur de l'abbaye par Hugues Tacons d'Aubigny.

Ego Andreas, Dei miseratione Attrebatens. episcopus, tam futuris quam presentibus in perpetuum. Cure pastoralis est ecclesiarum utilitati providere et donationes vel recognitiones ante nos factas futurorum noticie commendare, ne quid videlicet molestie vel, quod absit, adversitatis malignorum cavillationibus de collatis sibi rebus in posterum sustineant. Proinde notum fieri volumus omnibus ex aqua et Spiritu regeneratis, quod prebende de Albiniaco a laica potestate ad ecclesiasticam transierunt ordinationem, ita videlicet quod decedentibus canonicis secularibus, qui ibidem erant, abbas et fratres de Monte Sancti Eligii pro arbitrio suo canonicos regulares in ecclesia illa ordinarent. Quod nos quidem gratanter annuimus et licet super hoc magnorum virorum sufficientia munimenta penes se habeant, eorum tamen vestigia pro posse nostro sequentes, prompto animo predictam ecclesiam de Albiniaco cum omnibus rebus et decimis et appenditiis suis tibi, Eustachi venerabilis abbas de Monte Sancti Eligii, tuisque successoribus perpetuo ordinandam concedimus. Elapso autem aliquanto tempore, Hugo Tacons de Albiniaco et Balduinus Miete frater ejus adhuc juvenes, cum noviter ad militiam promoti essent et ad paternam hereditatem succedendo venissent, calumniam in prebendis illis posuerunt sed postea resipiscentes sponte in presentia nostra calumnie illi, quam fecerant, abrenuntiaverunt et donationem, quam avus eorum Balduinus Miete et avunculus eorum Hugo Tacons per manum Theoderici Flandrensium comitis fecerant, ratam habuerunt, hoc etiam addentes quod abbas de Monte Sancti Eligii et fratres apud Albiniacum commorantes tam ecclesiam quam omnes res ad prebendas pertinentes necnon etiam curtem suam, in qua edificia sua vel plantaria vel ortos suos fecerunt, quin etiam hospites suos quiete et libere possiderent et quod nullam ab hospitibus eorum violentiam exactionem extorquerent. Sed si forte dominus turris captus esset vel si filium suum ad militiam promoveret vel si filiam suam nuptui daret, hiis tribus causis intervenientibus, abbas, quod voluerit et ratio postulaverit, ab hospitibus suis debet exigere et ipsi dare. Si quis autem huic scripto nostro contraire et contradicere attemptaverit, donec resipuerit atque satisfecerit, excommunicationem subjaceat. Actum est coram istis testibus Frumaldo archidiacono, Nicholao decano, Ansello cantore, Johanne Duacensi cantore, magistro Roberto de Albiniaco, Sasgualone, Adam de Corbeia, Guidone nepote episcopi Sancte Marie canonicis necnon etiam Fulcone preposito, magistro Radulfo de Aria clericis episcopi, laicis etiam Petro Ymercurt qui fidem a juvenibus illis accepit, quod omnia que supra memorata sunt observabunt, hominibus etiam eorum Hugone de Sas, Hugone de Tenques, Hugone de Cambelinnol, qui similiter fidem dederunt de observatione predictorum.

Benoit Tock

[non indiqué] ([non indiqué])