Godescalc, évêque d'Arras, notifie que Ghislain, écolâtre d'Arras, a restitué à l'abbaye de Marchiennes l'autel de Mazingarbe.

In nomine sanctae et individuae Trinitatis. Ego Godescalcus, Dei gratia sanctae Atrebatensis aecclesiae humilis episcopus, universis catholicae ecclesiae filiis, in praesenti vita bonis operibus abundare et in futura fructum justitiae a Domino percipere. Quoniam aecclesiarum, quibus Deo auctore praesidemus, astringimur sollicitudine, nostra potissimum circa earum utilitatem desudare debet intentio pervigilique cura nobis laborandum est, ne per incuriam nostram rerum suarum aliquam sustinere videantur jacturam. Unde quia abundante iniquitate multorum refrigescit caritas et malorum de die in diem crescit perversitas, sollicite providere curamus ut res, quas aecclesiae Dei devotio contulit fidelium, vendicare sibi non praevaleat improbitas pravorum. Notum sit itaque omnibus fidelibus tam futuris quam praesentibus, quod aecclesia Marceniensis, quae in diocesi nostra esse dinoscitur, dudum prevalente tam praelatorum ejusdem ecclesiae quam subditorum incuria, tantam rerum suarum jacturam sustinuit, ut pene ad nichilum redacta sit. Inter caetera igitur, quae tunc temporis amisit, etiam altare de Masengarba, quod diu legitime possederat, negligentia possidentium in manus laicas devenit et sic praefata aecclesia possessione ejusdem altaris diu caruit. Quia igitur Deo donante vigor monastici ordinis in eadem aecclesia honeste praefulget veritatem rei gestae non ignorantes et, ne aliquod inde peccatum contraheremus, si ecclesiam illam a possessione quondam habita exheredari sineremus, metuentes, prefatum altare tam nostra benivola voluntate quam domini Henrici venerabilis archiepiscopi Remensis petitione ejusdem aecclesiae sollemni donatione restituimus. Itaque a persona ejusdem altaris, scilicet magistro Gisleno, qui illud tenebat, hoc idem altare recaepimus et tam ipso quam aliis Atrebatensis aecclesiae personis assentientibus illud praefatae aecclesiae Marceniensi perpetuo jure possidendum anno Incarnationis dominicae millesimo centesimo sexagesimo secundo, VI nonas martii tradidimus, et praesentis scripti tenore ac sigilli nostri impressione confirmavimus et omnes, qui deinceps idem altare ab eadem aecclesia vel vi vel subreptione aliqua alienare temptaverint, anathematis vinculo innodavimus. Signum Geraldi abbatis Viconiensis. S. Clarebaldi archidiaconi. S. magistri Gisleni. S. Franconis capellani episcopi. S. Theoderici canonici Sancti Vindiciani.

Benoit Tock

[non indiqué] ([non indiqué])