Godescalc, évêque d'Arras, notifie la transaction qui met un terme à la querelle opposant l'abbaye de Corbie à son avoué Robert de Béthune au sujet des tailles de Grosville, Wailly et Monchy.

In nomine Patris et Filii et Spiritus Sancti. Ego G[odescalcus], Dei miseratione Attrebatensium episcopus. Sciens ex defectu humane infirmitatis in multis nutare memoriam hominis ita ut, que prioris diligentia et pia sollicitudo solemniter ad pacem terminare studuit, oblivionis obrepente vitio, posteri revocarint in litem quia quomodo fuit, qui compositioni insudaret, non fuit qui vel compositionem vel modum compositionis scripto commendaret, presentis testimonio pagine et sigilli mei appositione volui tam futuris quam presentibus ecclesie filiis notum fieri, ecclesiam Corbeiensem et Robertum advocatum Betunie de controversia, que inter eos pro tallia de Wailli et Geroldi-Villa et Monci extiterat, talem concordie finem iniisse. Hoc enim ad mei curam spectat officii, ut non solum pro pace inter discordes facienda laborem sed etiam qualiter eadem firma et illibata in perpetuum maneat provida sedulitate invigilem. Robertus itaque advocatus, recognoscens se ecclesiam Corbeiensem in jamdictis villis injuste vexasse, omnem exactionem pro qua controversabatur, quam vulgus talliam sive precem solet nominare, in prememoratis villis guerpivit. Fide quoque ac jurejurando se de omnibus his pacem facturum pepigit, hoc concedens quod si aliqua predictarum exactionum ulterius possessionem ecclesie sciens sive nesciens per se sive per aliquem alium inquietare presumeret, nisi inde submonitus infra XV dies ecclesie Corbeiensi pro debito satisfaceret, per totam terram ejus divina interdicerentur. Tali conditione ecclesia Corbeiensis supersedit querelis, quas ante adversus advocatum habuit. Quod autem advocatus pactionem prenotatam ratam teneret et indissolutam, pepigerunt sub fidei interpositione homines advocati quorum nomina subscripta sunt : Guarinus de Anesin, Robertus de Guerekinmul, Theodericus de Hinges, Ibertus frater suus, Theodericus de Hierusalem, Gerardus dapifer, Guenemarus Delbiti, Gerardus de Menrevilla. Advocatus etiam, ut filii et successores ejus concessionis sue notitiam habeant et quod noverunt irrefragabiliter teneant, presens scriptum sigillo suo corroboravit. Et quia veritas non vacillat, quam idoneorum testium fulcit et confirmat auctoritas, nomina personarum nostrarum feci annotari, que prememorate dinoscuntur interfuisse compositioni : Nicolaus decanus, Frumaudus scolasticus, Hermarus, Rollandus, Johannes presbiteri, Petrus custos, Hugo de Beuri, abbas de Anecin, abbas de Marcienes, abbas Sancti Vedasti, abbas de Ham, abbas de Maruel, abbas de Aiguecort, abbas de Monte Sancti Eligii.

Benoit Tock

[non indiqué] ([non indiqué])