Godescalc, évêque d'Arras, confirme au chapitre cathédral d'Arras l'ensemble de ses possessions, qu'il énumère.

In nomine Patris et Filii et Spiritus Sancti, amen. Ego Godescalcus, Dei patientia Atrebatens. licet indignus vocatus episcopus, Nicholao decano, reliquisque fratribus aecclesiae Beate Marie Atrebatensis eorumque successoribus, imperpetuum. Quoniam, juxta apostolum, qui in benedictionibus seminat de benedictionibus et metet, ut et nos futurum aliquem eterne benedictionis percipiamus utilitati et quieti fratrum nostrorum providere debemus, quatinus ea, que predecessorum nostrorum episcoporum provida largitate vel regum aut principum liberalitate vel populi devotione hucusque obtinuerunt, in pace deinceps teneant, et que usibus suis necessaria nondum consecuti sunt nostri laboris efficatia obtinere valeant. Hoc pastoralis cura exigit, hoc officio episcopali congruit, canonum etiam censura instituit, ut precedentium patrum sanctiones inrefragabili auctoritate teneantur, et ne interveniente corporis ignavia situ negligentiae obducantur, successorum renovatione fulciantur. Si qua vero necessitati fratrum vel aecclesiarum accomoda humana imperfectione ab eis omissa sunt, a junioribus prout facultas suppetit suppleantur. Expedit enim ut qui materna tuentur viscera, materna sugant ubera, et qui in cotidiana matris sue laborant promotione, ejus cotidiana sustineantur refocillatione. Nos itaque, tanquam sponsus, sponseae Atrebatensis aecclesiae specialiter adherentes amplexibus, cui vinculo caritatis precipue debitores facti sumus, ut lacte sufficienti matris vestre foveamini, vobis, filii karissimi, in aecclesia prememorata Christo militantibus vestrisque successoribus altaria, villas vel quascumque possessiones alias communitati vestrae predecessorum benignitas contulit aut nostra et temporaneorum nostrorum auxit humilitas, sicut collata sunt ulterius possidenda concedimus et presenti pagina confirmamus : duas videlicet partes oblationum omnium, que fiunt infra aecclesiam et atrium beatae Mariae in Assumptione et Nativitate ejusdem virginis ab hora nona in vigilia usque ad eandem horam sequentis diei, exceptis candelis et cera ; et modium vini carioris, quem annuatim custos debet vobis in Nativitate beate Mariae de redditibus principalis altaris, et duas refectiones, alteram in Populus Syon, alteram in Purificatione sancte Marie de eodem altari ; et omnia opponderata per circuitu anni in aecclesia Beatae Mariae allata vel oblata, et oblationes, alteram Crucis in Parasceve, alteram Sepulchri in vigilia Pasche, in ecclesia eadem factas ; et duas partes altarii vestri et parrochiam Sancte Mariae cum tota decima et aliis, que sunt de jure ejusdem parrochie, liberam ab omni redditu episcopi et ministrorum ejus, preter candelas in Purificatione beate Marie et in die commemorationis fidelium defunctorum et per totum annum ad manum parrochialis presbiteri oblatas, que omnes de jurae custodis sunt, exceptis candelis familiarum missarum que vestre sunt ; et aecclesiam Beati Nicholai de Mellens, appendentium videlicet predicte matricis aecclesiae cum terra arabili ejusdem aecclesiae et tota decima parrochiae et aliis, que sunt de jure ejusdem aecclesiae, in eadem qua ejus matrix aecclesia est libertate, et sicut in nocte Nativitatis Domini, due oblationes et oblatio Crucis in Parasceve, de communitate vestra sunt in aecclesia Beatae Mariae ita et in appenditio ejus Mellens et omnia curtilia sive hostagia vestra infra predictas parrochias jacentia ; et totam decimam dominice curtis et terram arabilem pertinentem ad decimam et terram arabilem Gode, in confinio dominice curtis et Scuriaci sitam, et terram Fulberti, que est inter dominicam curtem et novam villam Ermenfridi, unde habentur XII denarii et duos mansos vel curtilia in nova villa Ermenfridi, que data sunt pro anima Petri prepositi, unde habentur V solidi ; et domum Ernulfi Calchennun in Strata et cambam vicedomine super pontem Tenardi sitam, et cambam Tenardi pene illi predicte oppositam, et cambam Ernaldi Gaulurde sitam sub Crientione, et terram datam pro anima Ogive matris Alelmi de Foro in introitu minoris fori versus Sanctum Gaugericum quam tenet major sub censu firtonis et dimidii ; et refectionem unam de prepositura Gaudete in Domino similem supradictis refectionibus ; et medietatem molendini de Becherel cum justicia tota ejusdem molendini ; et decimam vinee nostre et ecclesias Sancti videlicet Salvatoris et Sancti Gaugerici et Sancti Auberti et Sancti Stephani et Sancti Vincentii, tam infra muros quam in suburbio sitam, et Sancti Albini de Maresc cum tota decima parrochie et de Ansain, cum tota similiter decima, et de Juvenci in Gauharia liberas ab omni redditu episcopi et ministrorum ejus, cum terris et decimis aliisve possessionibus ad predictas ecclesias vel ad vos in parrochiis predictarum ecclesiarum pertinentibus ; et id juris, quod in aecclesia Beatae Crucis vel in novo burgo obtinetis, secundum privilegia venerande memorie Paschalis pape et predecessoris nostri Lamberti episcopi et hostagia infra muros vel extra, in suburbio ad vos pertinentia ; et aecclesias de Belraim, scilicet cum tota decima ville et terra arabili et curtilibus ejusdem aecclesiae et de Tilloi cum decimis et terra censuali ejusdem aecclesiae, quam injuste usurpavit sibi Gotrannus de Tilloi sed eo mortuo filiis abjudicata est, et de Wanchetin cum decimis et terra arabili et curtilibus, liberas ab omni redditu episcopi et ministrorum ejus, cum omnibus possessionibus ad vos infra parrochias earum pertinentibus, datis quotannis tribus solidis pro uniuscujusque illarum trium obsonio ; ecclesiam quoque Budelle cum appenditio suo Amelanicurte similiter liberam cum decima utriusque parrochie tota aliisque possessionibus illarum aecclesiarum, datis quotannis tribus solidibus pro utriusque obsonio ; et terram quandam censualem infra Amelanicurtem sex sextaria frumenti annuatim reddentem ; ecclesiam quoque de Monteoiscurte cum appenditio suo Guiva et omnibus, que de jure utriusque aecclesiae sunt, similiter liberam pro tribus solidibus obsonii pro utroque datis ; curtile etiam unum infra Guivam, quod Hugo de Guiva dedit communitati vestre pro anima sua ; ecclesiam quoque de Rochesaincurte cum appenditio suo Scuriaco et tota decima appenditii et omnibus, que ad jus utriusque pertinent, similiter liberam pro tribus solidis obsonii annuatim pro utroque datis ; et aecclesiam de Berla cum appenditio suo Moncello et omnibus possessionibus tam matris quam appenditii, liberam similiter pro III solidis annuatim ; ecclesiam quoque de Galcin cum appenditio suo de Chauscurte et omnibus, que de jure utriusque sunt, similiter liberam annuatim pro III solidis ; ecclesiam Galgiaci cum appenditiis suis Geroldivilla et Berlaidicurte et jure tam matris quam appenditiorum, liberam, datis dumtaxat II solidis annuatim pro obsonio matris et appenditiorum ; quecumque autem presbitero de Berlaidicurte offeruntur, presbitero matris aecclesiae ab eo reddi debent ; ecclesiam quoque Fresinicurtis cum tota decima parrochiae et appenditio suo Strees et jure tam matris quam appenditii, in omnibus liberam quotannis pro XI denariis et alodia de Strees et de Henincurte. Preterea confirmamus communitati vestre aecclesias debentes jus episcopi ministrorum ejus, Ligescurtis scilicet cum appenditio Bellencurte, quod liberum est ; et ecclesiam Horcee et Geldulficurtis et aecclesiam Scultis ad refectionem vestram in Quadragesima, et aecclesiam Croisillis et Sancti Leodegarii cum appenditio suo Lovenies et ecclesiam Fontainnes et Buhicurt cum ostagio quosdam X denarios et III capones et aecclesiam Ascei et Aeste et Dulci et Agni et Basseus cum tota decima parrochie et aecclesiam Symoncurt cum appenditio suo Bellomanso et aecclesiam Ablain cum appenditio suo Succes, quod liberum est, et aecclesiam de Davellicurt cum tota decima et medietatem aecclesiae de Anisinheldonis, et aecclesiae Nigelle cum appenditiis suis Avennes, Ripelli, Nigellula et terram censualem apud Nigellulam et alia omnia, que de jure supradictarum ecclesiarum omnium sunt vel que ad vos infra limites earum pertinent ; ecclesias etiam de Piz et de Curceletes et de Nue, et medietatem de Cheri, scilicet censum trium marcarum et dimidii, cum omnibus possessionibus earum vobis concedimus, sicut predecessor noster bone memorie Alvisus episcopus vobis concessisse dinoscitur, videlicet ad refectionem vestram in die obitus sui, in sollennitate Omnium Sanctorum et in Commemoratione fidelium defunctorum et in obitu patris et matris ejus et in Annuntiatione Beate Marie et in Ascensione Domini. Quas refectiones in alios transferri usus sub interminatione anathematis prohibemus, exceptis pauperum sustentationibus vel eorum redemptionibus ; ecclesiam quoque de Herbustella ad refectionem vestram, prece domini Luce archidiaconi, concessimus die festo beati Augustini ut sollemniter celebretur ; ecclesiam quoque de Bailues et appenditii ejus Borich integre, sicut Robertus prepositus tenuisse dinoscitur ; aecclesiam quoque de Roveri, quam prece Anselli cantoris vobis concessimus ad refectionem fratrum in die obitus sui ; ecclesiam quoque de Cultura, quam de manu laica redemistis. Insuper confirmamus vobis villas Scuriacum, scilicet totum infra villam et extra liberum preter gavalum comitis et districtam extra curtilia ; et villam Brai cum toto territorio suo et aqua et decima VII camporum, trium scilicet culturarum Beatae Mariae et II Eustachii de Squavias et sartelli exactoris et cujusdam campi inter Mareolum et Brai, liberam ab omni potestate mundana, preter quod V solidos advocature dat quotannis Albiniacensi domino ; et villam Moncelli cum toto territorio suo, preter quod ad scolasticum pertinet liberum similiter ab omni mundana potestate, excepto quod annuatim debet dimidiam marcam advocature Albiniacensi domino ; et villam Fresinicurtis cum toto territorio suo, liberam ab omni potestate seculari, excepto quod XXX solidos de beneficio Beatae Mariae heredi Helgoti de Hosdain quotannis persolvuntur propter injuriam, qua prefatus Helgotus villam eandem vexabat, unde eum ante mortem penituit et injuriam penitentia ductus abjuravit, sed Robertus filius ejus paternam tyrannidem in villam eandem exercens, XXX solidos ab aecclesia quadam compositione extorsit, hoc pacto quod si hospites ipsius ville in aliquo forisfacto, excepto latrocinio, infra comitatum suum sive in foro sive extra forum intercepti fuerint, nonnisi infra villam Fresinicurtis judicabuntur aut coram villico aut coram Sancte Marie preposito ; et villam Davillicurtis cum toto territorio suo, liberam similiter preter quod annuatim dimidiam marcam advocature dat domino Betuniae ; et villam Aesc, cum territorio suo et tota decima et molendino, liberam similiter preter gavalum comitis ; et apud Famplus alodium Bone Vitae et aliud alodium Fredelindis ; et totam villam Gudelle intus et extra, preter gavalum comitis, et ad jus advocati pertinent ; et villam Batseus cum toto territorio suo et justicia vel districto intus et extra, preter quod partem quartam, exceptis decimis et terragiis veteribus et his que ad jus prepositi vel majoris pertinent, predecessores nostri concesserunt Rogero de Bello Manso et heredi ejus, hac conditione quod villam, cambam, molendinum restauraret et terras male distractas et injuste obsessas et terragia novarum terrarum ad utilitatem canonicorum revocaret et V solidos advocature, quos in predicta villa accipiebat, dimitteret et hominium aecclesiae preposito faceret ; et terram de Tressennes, sicut ab antiquo a vobis possessa est, et terram de Novum, quam sub censu dimidie marce infra Nativitatem Domini annuatim persolvende tenet ecclesia Blandiaci ; et terram sive curtilia de Vez et terram Frigidevallis, unde canonici de Hosden dant annuatim dimidiam marcam infra sinodum ; et terram de Butimunt et alodia de Nue et curtilia in Bursa et unum in Hersin ; et terram apud Bruz et apud Vermellam terram arabilem cum curtilibus ; et apud Aviuns terram cum curtilibus ; et apud Iser Sancti Vedasti curtilia ; et apud Farbu terram censualem X solidorum ; et terragium apud Puci ; et terram apud novam villam Sancti Vedasti et terragium de alia terra ; et apud Camblin juxta Stradella curtilia ; et apud Frevin terram arabilem cum curtilibus ; et apud Asch similiter ; et apud Squavias similiter ; et terram, quam tenet Hermannus de Vilers et terragium apud Montem Sancti Eligii de alodiis de Roelcurt ; et apud Mareolum decimam totam de quatuor culturis episcopi et terragium de IX modiis terre infra eandem villam et II curtilia ; et terram apud Longues ; et terram apud Duisans ; et II partes decime cujusdam terre apud Grincurt ; et terram in Novillela juxta Warluiz et unum curtile ; et apud Monci terram et unum curtile ; apud Vi terram et curtilia ; apud Haucurt decimam de culturis Matildis de Oisi ; et apud Bulcult, terram ab omni potestate seculari liberam et curtilia ; et totam villam de Longa Hasta, excepto uno curtili, que reddit sex solidos census annuatim ; et decimam VIII culturarum apud Lambres ; et terram de Templuina, pro qua ecclesia Aquicincti dat II solidos et VII denarios annuatim ; et terram juxta Antuen, pro qua dominus de Antuen dat quotannis III solidos ; et apud Vilers juxta Rincurt terram arabilem ; apud Hervilier terram et curtilia et XVIII partem decime ; apud Andifer unum curtile et terram magnam ; apud Berlaicurdel decimam de culturis domini ejusdem ville ; apud Henin super Cogellum terram ; apud Sanctum Martinum decimam de quibusdam culturis Vicardi ; ostagia quoque, que dedit vobis Robertus prepositus ad refectionem canonicorum in die obitus sui ; ostagia quoque, que dedit Salebertus. Quicquid autem in posterum aecclesiae vestrae fuerit collatum, ad usus vestros vel a vobis canonice adquisitum cum predictis fraternitati vestrae concedimus perpetuo possidendum. Si quis vero infanda presumptione aut temeraria infestatione hujus constitutionis nostre seriem violare temptaverit vel ab ecclesia quicquam supradictorum alienaverit, nisi secundo terciove commonitus satisfecerit, cum Symone mago anathema sit. Ut ergo rata et illibata permaneat nostre confirmationis pagina, presentium testium subnotavimus nomina. Signum Guerrici abbatis Sancti Vedasti. S. Symonis abbatis de Alicurte. S. Balduini abbatis de Mareolo. S. Radulfi abbatis de Monte Sancti Eligii. S. Luce archidiaconi. S. Hugonis archidiaconi. S. Clarebaldi prepositi. S. Nicholai decani. S. canonicorum Frumoldi magistri, Hermari, Herberti, Hugonis de Dici, Willelmi.

Benoit Tock

[non indiqué] ([non indiqué])