Alvise, évêque d'Arras, concède à l'abbaye du Mont-Saint-Éloi l'église d'Aubigny, à charge pour l'abbaye d'y établir des chanoines réguliers.

In nomine Patris et Filii et Spiritus Sancti, amen. Ego Alvisus, Dei miseratione Atrebatens. episcopus, tam futuris quam presentibus in perpetuum. Quoniam ex debito pontificalis sollicitudinis nostre precipue interest dignitatis ecclesiarum Deo auctore nobis commissarum perfectibus insudare et earum dejectionem pro viribus relevare, opportunum duximus ecclesiam Albiniacensem clericorum secularium incuria pessundatam et religionis vigore destitutam ad meliorem gradum reformare et beati Augustini regule in libertate spiritus subjugare et, quia eadem ecclesia sub laica potestate diu languerat et tanto depressa jugo exurgere nequaquam poterat, inspirante divina gratia, a Hugone Candavena et filiis suis Ingelranno et Ansello nobis est reddita, ecclesie de Monte Sancti Eligii studio ad communis vite ordinem provehenda. Eapropter, dilectissime frater Hugo ejusdem ecclesie venerabilis abbas, pro tua religione necnon laudabili fratrum tuorum opinione, Albiniacensem ecclesiam cum suis appenditiis tibi successoribusque tuis tradimus perpetuo possidendam quatinus per te et tuos erigatur in ea Dei servitium et conservetur unitasque inibi clericorum regularium teneatur. Ut autem hujus constitutionis nostre pagina rata et inconvulsa in posterum habeatur, apposita sigilli nostri imagine pontificali auctoritate roboratur. Sane si quis inconsiderate huic obviare et temerario ausu violare temptaverit, secundo terciove commonitus, nisi resipuerit, cum Symone mago anathema sit. Nos itaque, ut hoc privilegium inviolabiliter confirmemus, presentium personarum signa subnotari jussimus. Signum Luce Atrebatensis archidiaconi. S. Hugonis Ostrevandensis archidiaconi. S. Nicholai decani. S. Anselli cantoris. S. Adam diaconi. S. Roberti subdiaconi. Ego Alvisus, Dei miseratione Atrebatensis episcopus, hoc privilegium relegi, subscripsi et in nomine Patris et Filii et Spiritus Sancti propria manu confirmavi (Signum crucis).

Benoit Tock

[non indiqué] ([non indiqué])