Alvise, évêque d'Arras, concède à l'abbaye Saint-Rémy de Reims l'autel de Monchy et la chapelle de Lueres.

In nomine Patris et Filii et Spiritus Sancti. Pastoralis officii sollicitudo nos ammonet ecclesiarum utilitatibus providere et omnem ab eis in posterum molestiam pro posse repellere. Quapropter ego Alvisus, Dei gratia Atrebatensis episcopus, ob antiquam et laudabilem inter Beatum Remigium et Beatum Vedastum habitam amicitiam, ecclesiam Beati Remigii maximo semper veneratus affectu, frater karissime in Christo Odo predicti monasterii Beati Remigii abba, altare de Munci juxta Hosden situm cum appendiciis suis et capellam de Lueres tibi tuisque successoribus in eo quo nunc es loco et ordine Deo militantibus perpetuo jure tenendum concedimus, salvo in omnibus jure Atrebatensis episcopi et ministrorum ejus. Ut autem hujus nostrae donationis privilegium ratum inconvulsumque permaneat, fidelium testium subscriptione et sigilli nostri impressione confirmamus. Signum Luce Atrebatensis archidiaconi. S. Hugonis Ostrevandensis archidiaconi. S. Thome cantoris. S. Gozuini Aquicinensis abbatis. S. Fulconis Hasnonensis abbatis. S. Hugonis abbatis de Monte Sancti Eligii. S. Symonis Ailcurtensis abbatis. S. Basilii, Rollandi, Herberti presbiterorum et canonicorum. S. Frumaldi, Adam canonicorum et diaconorum. Si quis vero hujus nostrae constitutionis paginam perturbare aut aliqua presumptione temerare temptaverit, anathematis eum vinculo innodamus donec de perpetrata iniquitate digna emendatione satisfaciat. Ego Alvisus, Dei gratia Atrebatensis episcopus, nostre liberalitatis donativum relegi, subscripsi et propria manu in nomine Patris et Filii et Spiritus Sancti confirmavi. Actum anno incarnati Verbi Mº Cº XLº IIº, pontificatus domni Alvisi Atrebatensis episcopi XIº.

Benoit Tock

[non indiqué] ([non indiqué])