Alvise, évêque d'Arras, donne à l'abbaye Saint-Rémy de Reims les autels de Beugin et de Houdain.

In nomine Patris et Filii et Spiritus Sancti, amen. Quoniam ad hoc domui Dei speculatores dati sumus, ut in ecclesiis Deo auctore nobis commissis et tepescentibus interius religionis vigor reformetur et imminutarum extrinsecus temporalium rerum status in melius reparetur, idcirco ego Alvisus, Dei gratia Atrebatensis episcopus, venerabilis in Christo Odo ecclesiae Beati Remigii abba, ecclesiam de Hosden actenus sub manu laica ancillatam cum ecclesia de Belgin et ceteris omnibus appendiciis suis tibi tuisque successoribus in eo quo nunc es loco et ordine Deo militantibus pro animae nostrae et predecessorum nostrorum salute, salvo in omnibus jure Atrebatensis episcopi et ministrorum ejus, perpetuo jure tenendam concedimus, ea videlicet ratione ut, decedentibus canonicis, monachos ibidem sub regula beati Benedicti Deo militantes, prout oportunitas loci et temporis se exhibuerit, constituere ne differas ut, sicut temporalium rerum facultas Deo donante multiplicata fuerit, ita numerus fratrum ibidem Deo servientium augmentetur. Ut autem hujus nostrae donationis privilegium ratum inconvulsumque permaneat, fidelium testium subscriptione et sigilli nostri impressione confirmavimus. Signum Lucae Atrebatensis archidiaconi. S. Hugonis Ostrevandensis archidiaconi. S. Thomae cantoris. S. Gozuini Aquicinensis abbatis. S. Fulconis Hasnoniensis abbatis. S. Hugonis abbatis de Monte Sancti Eligii. S. Symonis Ailcurtensis abbatis. S. Basilii, Rolandi, Herberti presbiterorum et canonicorum. S. Frumaldi, Adam canonicorum et diaconorum. Si quis vero hujus nostrae constitutionis paginam perturbare aut aliqua presumptione temerare presumpserit, anathematis eum vinculo innodamus, donec de perpetrata iniquitate digna emendatione satisfaciat. Ego Alvisus, Dei gratia Attrebatensis episcopus, nostrae liberalitatis donativum relegi, subscripsi et propria manu in nomine Patris et Filii et Spiritus Sancti confirmavi. Actum anno Verbi incarnati Mº Cº XLº IIº, pontificatus domni Alvisi Atrebatensis episcopi XIº.

Benoit Tock

[non indiqué] ([non indiqué])