« actes-philippe3-92 »

Pro escanbio faciendo cum episcopo Panpilonensi et finenciis Judeorum Navarre et aliis.

<Philippus>, Dei gratia Francie rex, gubernatori regni Navarre, salutem. Alias vobis scripsisse meminimus quid de tradendis ad retinendum castris et forceriis regni Navarre et de finenciis Judeorum terre ejusdem, de quibus nos nunc consulitis, agere debeatis, vobis mandantes quatinus quod vobis inde alias mandatum est servetis. De escanbio vero faciendo cum episcopo Panpilonensi super hoc quod habet in burgo et Navarreria Panpilonensi quod centum libras vel circa, sicut intelleximus, estimatis valere, vobis non possumus respondere usque circa mensem instantis festi Omnium Sanctorum, cum de hoc audire nos oporteat dilectum militem nostrum Eustachium de Bello Marchesio, predecessorem nostrum, qui de talibus habet notitiam pleniorem. Ad aliud autem quod de vineis, terris et domibus Navarris tradendis ad censum queritis, respondemus quod bene placet nobis dum tamen non astringantes aliquas conventiones tenendas ultra tempus per quod debet regnum Navarre in nostra manu teneri ; super etiam quod a nobis petuntur debita eorum quorum hereditates in Navarra tenetis, volumus quod in hoc foros et consuetudines Navarre, pro ut iustum fuerit, obseruetis. Sed et de debitis in quibus tenebantur Garsias Almoravid et alii malefactores, quorum terras tenetis, placet nobis quod si, secundum predictos foros et consuetudines de ipsis debueritis respondere inquisito plenius, de eisdem respondeatis creditoribus justitia mediante, nostrum tamen in arduis consilium expectantes. Datum apud Sanctum Germanum in Laya die veneris post octabas beatorum apostolorum Petri et Pauli.